Shoppe gehe, des macht Schbass,
merr prowiert aa gern mol was,
mol en Rock unn mol e Blus,
aa'n schääne Schuh fer an de Fuß.
Unn aa die Fraa Flanier
find am Eikaafe Pläsier.
Ää Hoss, die hot's ehr aagedaa,
sie prowiert se aa glei aa.
So e Paar Hosse hedd se gern,
vun de Farb her topmodern,
sitze duun se wie beschdellt,
de Schnitt besonners ehr gefällt;
sogar im Preis schun runnergsetzt -
der Kaaf werd glei getätischt jetzt.
Ään Hooke hot der guude Fang,
die Hossebää, die sinn zu lang.
Aach, denkt die Fraa in Euphorie:
kerzer mache krieh ich hie.
Hochzufridde kummt se hääm,
macht sich's glei am Disch bequem,
holt en Meter unn e Scher,
macht sich iwwer die Hosse her.
Zeh Zentimeter missen ab,
zwölfe weern e bissje knapp.
Mit rode Backe duud se messe,
es Abstecke aa net vergesse,
was zuviel is, schneid se ab,
dann macht die Neemaschin zack-zack.
Ää Hossebää, des is geschafft,
des hot geklappt ganz fabelhaft.
Jetzt nochemol die Prozedur,
es is schun fascht Routine pur,
unn in besonners kerzer Zeit
isse zum zwätte Mol so weit.
Froh, dass die Näherei so leicht,
hot se de Spichel dann erreicht,
wo se sich in voller Pracht
mit de Hosse jetzt betracht.
Es Spichelbild lescht's Lache aus
unn sie ruft: oh Schreck, oh Graus,
was is dess in aller Welt,
so hatt ich mer's net vorgeschdellt!
Irgendwie fehlt de Proporz -
ää Bää is lang, es anner korz!!!
Die Arweitswut hatt se so geritte,
dasse ää Bää zwäämol abgeschnitte,
unn's anner Bää vum Hosse-Fang
war grad wie vorher noch so lang!
Unn mit ganz betriebtem Sinn
bringt se's Maleer zur Schneiderin:
die denkt sich e Leesung aus
unn macht Caprihosse draus!
