Uff die Gsundheit

En Schdammdisch is e schäänie Sach,
do werd verzehlt, do werd gelacht,
aa im Derfche namens X
is so e Schdammdischtreffe fix.
Do trefft sich faschd de halwe Ort,
jeder ergreift emol es Wort,
sogar de Parre is debei,
der drinkt aa gern e Gläsje Wei.
So hockt freelich merr beinanner,
de äänd wääs dies unn dess de anner.

Unn midde in de Dischbediererei
do fallt em Parre pletzlich ei,
dass fer de Owend sei Tablette
er noch net eigenumme hädde.
Schnell greift er in sein Hossesack
unn holt sei Pille ganz zack-zack
eraus, unn uff ään Streich
nemmt er se dann ei sogleich,
e ganzie Handvoll schluckt er unner
unn schpielt se mit me Schoppe nunner.

Der Owend, der geht freelisch weiter,
do merkt de Parre, dass jetzt leider
sei Heergerät als schwächer werd
unn er kaum noch ebbes heerd.
Do hot die Batterie de Geischt uffgewwe,
saat er, dess is äfach zu behewwe,
weil ich des hab sehe kumme
unn en Ersatz glei mitgenumme.

Jetzt fallt em bloß net sofort ei,
wo hot er des Battriesche nei?
Ich wääß, in ääm vun meine Säck
hab ich des Ding eneigeschdeckt.
Sowohl im Sakko als im Hemd
werrn alle Dasche dorchgekämmt,
doch die Knoppzell daucht net uff.
Do kummt de Parre widder druff,
wo die Battrie er hot gelosse:
im rechte Sack vun seine Hosse!

Doch de Hossesack is leer,
do is kää Batteriesche mehr,
er hot's, weil er net geguckt,
mit seine Pille nunnergschluckt!!!
Do hot de Schdammdisch laut gelacht
unn jeder hot sei Witz gemacht.
De Parre hot des net geschdeert,
weil - er hot jo nix geheert!