A Wei isch scho was Guads

A Wei isch scho was Guads

©Hans Hartmut Karg
2017

Wenn miar am Obad a Fläschle köbfad,
A weng no in dia Sonn neigugga,
No a weng dia Salami schröbfad,
Hod onsr Dag gar koine Lugga.

Wia hond Voarfahra dees ausg'halda,
Seldn a Biar ond seldn an Wei,
Nuar bei dr Kirbe a gloins Gläsle halda,
Ond sooschd emmr endhaldsam sei?

Dr Wei isch Goddesgab' ond guad
Ond miar wollad dean o geniaßa.
Dear schaffd ons widdr neia Muad –
Ond dees muaß ma reichle begiaßa!

Drom drengad miar o reichle viel
Von oserm Neggdarhemmel,
Denn wär kennd scho des groaße Ziel
Do droba, hoach em Hemmel?

*