Appel mit Gatt plattdeutsch

Ik will een Appel eeten.
Dat Ding, dat hett een Gatt.
Wiel ik een Vegerarier bün,
bün ´k nu wohrachtig satt.

Dor binnen sitt een Wurm in,
de Appel is bewohnt.
Ik bün dor heel nich düll üm,
wiel sück dat vör mi lohnt!

Ik wull een Huusdeer kopen.
Nu bruuk ik heel kien mehr.
Mien Wurmke sitt in d´Appel,
hum maakt dat dor Pläseer.

Ik koop mi noch ´n Appel.
Mit Gatt, dat is doch klor.
Denn hett mien Wurmke Naberschupp!
Is dat nich wunnerbor?

Sabine Brauer