Miar gangad off d'Meß'

Miar gangad off d'Meß'

©Hans Hartmut Karg
2018

Jeez Joar emr em Juni
gangad miar alle off d'Meß'.
Do driffd ma an Haufa Leid,
dia ma sooschd nedd driffd.
Dees isch dees Scheanschde:
Ma wechsld a baar Woard ond a Lacha
ond frääd se, dass ma se gsäa hodd.

Am Wiechdleschdand a langa Schlang',
denn alle wollad Wieschdle ässa.
Midd oosre Wieschdla gangad miar
emmr zuam ehemaliga Sixagarda
ond hoggad ondr an Boom,
denn do isch's so herrle kial –
ond d'Mooß schmeggd reechd guad!

Äaschd dann gommr alle g'schdärgt
durch dia lange Budaschdrooßa,
koffad vielleicht a Messr, an Naglzwiggr,
manchmol o a gloins Rendnerdöbbfle.
Fiar d'Engala schiaß i dann a Bloam
ond koff eane Gebrennde Mandla,
denn alle meegad dia gäara ässa.

Midd meine gräaßere Engala
fahr i no em Riasarad hoch.
Von do hodd man an weida Bligg
iaber dees scheane, flache Rias.
Ond nuar von däara Hee' aus
siggd ma so guad dean Daniel,
däar alle griaßt, Groaße ond Gloine.

Zoam Schluss no an guads Ois
ond a baar Lose beim Rooda Greiz.
Ma g'wennd zwar kaum ebbas,
aber ma hodd a guads G'fiel,
a weng ebbas recht Guads
fiar d'Welld g'macht d's haba,
in däar so vial Armuud.

Nochdeam mir alles a'gschobbd hond,
hollad miar oos no a Bäggle Wieschdla
fiar morga Middag, fiar'd Migrowelle.
Dia schmeggad am näggschda Daag
midd am Kardofflsallad am Beschda!
So hodd dia Meß' no an feina Noochhall
ond miar freiad oos scho aufs näggschde Joar.

*